खेळ म्हणींचा

खेळ खेळू या म्हणींचा ।
शोध घेऊया त्यांतील अर्थाचा ।।
छोटीशी ओळ खूप सांगून जाते ।
म्हणून तर पुन्हा पुन्हा ऐकावीशी वाटते।।
एक म्हण सांगते
करावे तसे भरावे ।
तर दुसरी सांगते,
मरावे परि किर्तीरूपी उरावे ।।
तिसरी तर म्हणते
सहन करू नका तोंड दाबून बुक्यांचा मार ।
चौथीचे सांगणे
नेहमीच असतो उथळ पाण्याला खळखळाट फार ।।
पाचवी समजावते
एका हाताने टाळी वाजत नाही ।
सहावी बोलते
काठी मारल्याने पानी दुभंगत नाही ।।
सातवी सतत टोकते
जलात राहुन माशांशी वैर करू नये ।
आठवी दटावते,चोर सोडून संन्याश्याला फाशी देऊ नये ।।
नववीचे म्हणणे,
टाकीचे घाव सोसल्याशिवाय देवपण येत नाही ।
दहावी तर म्हणते कावळ्याच्या शापाने काही गाय मरत नाही ।।
अकरावी गुरगुरते
उस गोड लागला म्हणून मुळासकट खाऊ नका ।
बारावी हळूवार बोलते
उतावळा नवरा होऊन गुडघ्याला बाशिंग बांधू नका ।।
ह्या तर फक्त बारा म्हणी
शोधल्यातर अजून कितीतरी सापडतील ।
कमी शब्दांत लपलेल्या खूप गोष्टी समजतील।।
जमेल तिथे म्हणींचा वापर करायला शिका ।
मराठीसाठी जगा आणि मराठीला जगवा।।
माय मराठीचा हा संदेश सर्वत्र पसरवा ।
तिचा मानाचा झेंडा उंच उंच फडकवा ।।